Deputetja e Partisë Demokratike Grida Duma në një deklaratë për mediat ka lajmëruar largimin e saj nga politika, duke lënë mandatin e deputetes. “Kam dorëzuar shkresën për lënien e mandatit. Pas një reflektimi të gjatë, reflektim që vjen pas një përpjekje të gjatë për të bërë të duhurën për partinë time dhe votuesit që përfaqësoj, ky është vendimi i duhur.
Mendoj që në politikë fatet individit vlen të konsiderohen dhe rimendohen vetëm kur ato shkojnë në një kahje me fatet e njerëzve dhe vendit, kurrë e kundërta megjithëse e kanë bërë shpesh të kundërtën.
Fati i njerëzve që përfaqësoj është misioni i vetëm që i përgjigjem. Më e thjeshta për mua do ishte të kisha qëndruar të prisja të mos ndodhin dështimet që disa u parashikojnë, siç e di që ka edhe nga ata që presin skutave për shansin e humbur.
Mund të qëndroja për të mbijetuar, duke vegjetuar. Shumë vite në politikën e vijës së parë nuk i jam larguar përgjegjësie e as betejës”, tha Duma.
Vendin e Dumës në Kuvend pritet ta zërë moderatorja Oriela Nebijaj, duke bërë në këtë mënyrë një rokadë mes saj dhe Dumës.
Kujtojmë që një ditë më parë pati një tjetër dorëzim nga ana e deputetëve të PD që ishte ai i Alfred Rushajt, vendin e të cilit në Kuvend do ta zërë Petrit Doda.